Tan Tereang Kabarayo

No comment 9 views

Tan Tereang KabarayoTRAVESIA.CO.ID – Aghi ghayo ampiang tibo. Nan Tantereang samakin poniang. Bukan dek ndak jadi pejabat negara, bukan pulo dek urusan negara. Indak dek itu deh. Indak lo dek liau lun boli baju ghayo. Sobob dek Tan Tereang, ndak baju baghu tu nan parolu deh.

Potangkeh, laiu poniang dek kegiatan ramadhan nan kadiadoan Remaja Mesjid. Yo, namonyo remaja, ntu butuh bimbingan. Ciek lai, sebagai pembina Remaja Mesjid, ndak buliah lopeh tangan se tontang kegiatan nan diadoan tu deh. Walaupun Remaja Mesjid binaan liau ko sakali sataun se nampaknyeh eh. Kotu bulan paso se ado nyeh liak. Mintak sumbangan lo tih utuak  maadoan acara. Kadang ampiang tongah malam boghu muai lo. Ntah bilo slosainyeh. Untuang Tan Tereang lai biaso batonggang nonton bola. Jadi, bisa juo ndongaan acara tu sambia lolok-lolok di ghumah. Walaupun kadian takolok juo eh. Hehe.

Lah salosai itu, ado lo nan lobiah mambuek poniang lai. Undangan untuak buko basamo banyak bona. Daghi alumni EsDe olah slosai. Lai jumuh-jumuh pulangnyeh. Untuang se lai ndak domom. Kini ado lo daghi alumni pesantren, alumni Sem-A. Olun daghi organisasi pemuda lai. Maklum se lah, Tan Tereang ko walaupun nggaleh cindua kini, dulu lai juo sempat jadi calon ketua pemuda kecamatan mah.

“Juh, kok poi den ka acara alumni Sem-A tu ba nyeh” nyi Tan Tereang kotu undangan melalui eFBe tu dibaconyeh sudah nggoghik.

“Tasoghah dek uda, lah” jawek Tek Ijuh langsuang maambiak kain saruang jo talokuang. Siap-siap ka masojik poi sambayang isya.

Nan Tan Tereang, obeh bona laku bini nan soman iko.

“Ndee, jan soman itu bona lai, Juh.. Kok ndak buliah, indak nah uda poi” nyi Tan Tereang ko.

“Yo, beko tacompuang lo uda ka tobek baliak. Jaleh wak ketua, sok-sok mbasuah pinggan lo kojo tih” nyi Tek Ijuh. Malu-maluan ughang se.

“Iyo, sayaang… Suak keh indak lai” nyi Tan Tereang sambia mambaik an kapiah.

“Samo wak ka masojik. Dia uda iduk an Sebe Saghatuh nan penuh kenangan wak tu hah” Tan Tereang sudah tu marayu.

“Yo, jan poi uda, ndak. Beko basuo lo jo mainan lamo uda beko” Ijuh tambah monjo. Cemburu kighonyeh. “Ntu kok poi uda, sia lo nan ka manggaleh cindua. Saketek lo dapek piti. Ndak dapek lo mboli baju ghayo beko” nyi Ijuh sudah tu. Nampak padusi nyeh baliak. haha

Itu lah sabonanyeh nan diponiang an Tan Tereang. Kecek Tek Ijuh tigo aghi nan lalu, untuak mamboli baju ghayo. Kalau dek liau, kan lah dikecek an cako, indak itu nan parolu deh. Tapi dipikia-pikia pulo, walaupun ndak itu nan target utamo atau skala prioritas bak nyi ughang kini, nan dek bini jo anak tontu kadibolian juo. “Beko sogan lo dek wak ughang. Badoso lo ughang dek awak kok ngecek-ngecek an wak ndak bisa mbolian baju ghayo deh” mambatin Tan Tereang.

Dek samangek untuak manyonang an anak jo bini, Tan Tereang samakin kuek bausaho. Salain manjua cindua, Tan juo manjua kacang diobuh ciek. Pongek ikan pantau, gulai paku bakeluak, ghondang pucuak kalikih, sampai manjua saghowa jo baju ghayo onlen bagai. Liau sekedar jadi tukang soghak se. Kok ado nan mosan, bakecek an nan ka nampun barang tu, ntu dapek komisi gak saketek.

Salain njua cindua jo nan cako tu, salamo bulan paso, tiok pagi, Tan Tereang ko lai lo kojo nyeh. Noloang mangacau kalamai di tompek ughang mbuek kalamai ten ah.  (Yo ndak mungkin lo di tompek ughang mbuek aia aka deh). Salamo satangah aghi. Sudah luhua, liau lah siap-siap lo untuak nggaleh cindua.

Bitulah, salamo duo paso, indak onti kojo Tan Tereang deh. Pas limo aghi trakhir, dibagian lah gaji dek ughang nampun usaho kalamai ko.

“Ko gaji ang, Tan” diagiah an nyeh piti jo amplot rono putiah dek Uwan nampun usaho kalamai ko.

“Makasih, wan”

“Mulai bisuak, wak baghonti kojo lu” nyi nampun nyeh. “Stok kalamai lah banyak. Jadi kok ndak abih pulo beko eh.” tambah Uwan tu.

“Yo, wan” nyi Tan Tereang bausaho ngroti, walaupun ndak tabado ibonyo ati.

Satiboyeh di ghumah, baselo an bona osah-osah, babukak lah amplot cako.

“Lai banyak, da” nyi Tek Ijuh

“Lai juolah. Gaji per hari se bontuak nyeh”

“Ndak ado THR diagiahnyeh dek Uwan tu? Kok ado, bisa lo wak poi mboli baju ghayo wak lai”

“Ndak ado deh, Ijuh sayang…”

“Ntu ba lai keh. Ndak dapek THR wak deh tih”

“Kok lai nan mbaco crito wak ko ka maagiah THR beko” nyi Tan Tereang golak manih, sambia maughak selo.

 

Okto Muharman, budayawan yang tinggal di Batu Hampar, Limapuluh Kota.

Leave a reply "Tan Tereang Kabarayo"