Carito Tan Tereang Edisi 8

oleh -38 views
Carito Tan Tereang Edisi 8

TRAVESIA.CO.ID – Potangkeh, dek bulan paso dan keadaan nan mamoso, Tan Tereang manggaleh sonjo-sonjo di pasa pabukoan nagoghi. Liau manggaleh cindua baduo jo Tek Ijuh. Kadang Tan Tereang se nan poi manggaleh. Nan Tek Ijuh mangasuah jo mbuek samba di gumah.

Cindua nan digaleh bukan sambarang cindua. Cindua bogheh resep tughun tamughun daghi niniak Tek Ijuh. Nan Tan Tereang ndak keluarga panggaleh deh. Kok lai, mamak nyeh dulu nan lai mancubo. Manggaleh kapua barus jo kapua ajaib.

Dia aghi nan partamo, lah pukua satangah limo olun bajua boli cindua Tan Tereang ko. Lamo mananti ughang, ponek mancoliak an barang, pikiran nyo mulai malayang-layang.

“Kok jadi pejabat negara, mungkin ndak soman iko bona den deh” nyi Tan Tereang dalam ati.

Tabayang dek liau kotu poi ka Jarkata. Ka tompek mamak nyeh. Kotu tu, anak mamak liau bagholek. Anak liau ko kalau ndak salah namonyo si Roih. Tapi tapampang pek papan nan babungo-bungo tu dek Tan Tereang lain namonyeh. Ontah bilo pulo jadi Rossalinda.

Nan olek yo sabona godang. Di gedung. Kok makanan yo sabanyak nyeh. Agak an lah, dalam gedung  na loweh nyeh ampiang sparo lapangan bola, sakaliliangnyeh makanan se. Sobuk lah. Ado sadonyeh. Mulai daghi sup, soto, bakso, lotek, sate. Pokonyeh longkok gonok. Es krim bagai ado.

Bitu juo jo ughang nan datang. Bamocam. Tapi nan nampak dek Tan Tereang yo ughang godang-godang se. Pakai jas jo dasi se nan banyak. Ado lo nan babatiak. Ntu ndak sangenek lo nan baseragam dinas deh. Kok dicoliak-coliak bona, banyak pejabat negara nan nampak di tipi dek Tan Tereang. Ntu poghuk preman tu banyak lo nan maju sangenek.

Dicoliak dek Tan Tereang, indak saagak pulo slegho preman tu deh. Lobiah dek uwan nan gopuak tu nampak dek Tan Tereang ah. Balontuang an se sadonyeh. Kacomoh an pulo tih. Sudah poi ka grabak sate, pantak lo soto gak sapinggan. Ntu kinyam lo mpek-mpek duo slada. Olun juo sodo atinyeh lai, lontuang an pulo bakso sa porsi lai. Ntu es krim tigo galeh panyudah an nyeh. Sudah tu balopeh an sandao godang.

“Ba nyeh, Tan?”nyi mamak liau.

“Ndak ado ba ba deh mak”

“Lai ancak olek den”

“Lai, mak. Ghancak bona”

“Walaupun banyak piti den  kalua an untuak iko, tapi beko lah baliak lo keh. Tapi den ghaso balabo lo dek lai banyak nan tibo”

“Yo santiang Mak, iah” nyi Tan Tereang manjauah. Mancaghi nan digin-dingin.

Kotu bajalan ncaghi es krim, nampaklah bintang pilem paporit nyeh. Dian Sosro. Untuang Ijuh ndak babao kotu tu. Sodang baghanak ketek. Kok dibao,ontahlah gak nyeh. Liau maampiang ka Dian ko. Kotu tu, kebetulan bona Dian ko sodang makan es krim. Tapi lai ndak soman uwan cako deh.

“Mbak Dian ya” nyi Tan Tereang pakai baso Indonesa raya.

“Iya” nyi Dian Sosro ko sambil senyum manih. “Mas nya siapa, ya?”

Ntah tibo di sarugo nan nomor bogha lah Tan Tereang ghaso nyeh kotu itu ncoliak senyum menawan si Dian ko ah.

“Saya Sultan. Sepupunya Roih. Rossalinda” nyi Tan Tereang.

“Kok jarang keliatan ya. Padahal saya sama Ross sering heng ot”

Ntah a nan heng ot ko, yo ndak obeh dek Tan Tereang deh. Tapi dek lai agak pasiah juo liau bajawek juo.

“Kebetulan, saya lama di luar” nyi liau. Luar ko luar ghumah gak nyeh. Yo kodok poi ka sawah jo ka poghak eh. Ntu baso liau jaleh juo baso awak nyeh tih

“Bisnis apa?”

“Sayur-sayuran” nyi Tan. Eh Sultan ko takona kotu nanam lado dulu.

Lah lamo maota, lah kadaghek ka lauk pulo, takojuk ado nan bakatuntang di ampiang Tan. Kighonyeh, dek jauah monuang, ndak obeh lah konai grabak cindua liau dek mantan Joroang. Mantan pejabat negara ko dek sodang bagorah jo ughang manggaleh cibotiak goreang di sabolah, a lah takipeh an secindu Tan Tereang. Tajatuah lah cindua ko. Taleak ka tanah.

“Itulah, mangamek-ngamek soghang juo” Tadonga sagho Ijuh daghi lakang.

Takojuk Tan Tereang

“Woi, mantan Joroang. Ba cagho nyeh keh”

“Mooh, Tan”

“Ndak tolok dek moh se deh. Gonti galeh den”

Dikoghuak saku, kighonyeh siso piti duo ghibu. Sudah mboli bakwan

“Ndeh.. Indak ado solusi lain, lai Tan?” nyi mantan pejabat negara ko maibo.

 

Okto Muharman, budayawan yang tinggal di Batu Hampar, Limapuluh Kota.

Tinggalkan Balasan

Alamat email Anda tidak akan dipublikasikan. Ruas yang wajib ditandai *

This site uses Akismet to reduce spam. Learn how your comment data is processed.