Carito Tan Tereang Edisi 5

oleh -50 views
Tan Tereang Bataghonak Ayam

TRAVESIA.CO.ID – Dek aghi ampiang masuak paso, di kampuang Tan Tereang, banyak kegiatan nan diadoan. Baiak daghi nagoghi soman toroyoang, ataupun daghi masyarakat atau kelompok-kelompok nan ado. Soman pangajian jo dua masuak paso misanyeh. Iko tradisi nan ghancak.

Dulu, kotu Tan Tereang mudo-mudo, tiok taun liau jadi panita pengajian jo dua masuak paso di joroang liau. Kanti-kanti nan samo konsi jo nan samo duduak di lopou dulu, joloang paso tu, lah mangumpua an piti atau sumbangan lain untuak acara pengajian ka panitia nan lah ditunjuak samo-samo. Ado anggota nan manyumbang piti se. Ado nan jo tanago soman maangkuk kayu. Ado pulo nan maaggiah an kambia untuak manggulai. Kadang, dek nampak samangek nyeh, ado lo nan maagiah kambiang. Babagai caro nyeh. Yo mak lum se lah. Piti parolu yo agak banyak. Mulai daghi seo tenda jo krusi, atau pamboli bogheh jo lauak. Atau kambiang gak saikua. Tapi caro mangumpua an piti nan kodok, jo manyabik atau konsi samo-samo. Anggota nan ndak biaso konsi, poi juo. Kok indak bona manyabik, untuak maghamian se jadi juo. Kojo sambia bagolak-golak. Yo bona sero kotu itu.

Tapi bogha aghi ko, ado pengumuman baso ka maadoan toroyoang untuak mambarasiah an lamposi. Liah nak ghancak lo lamposi nagoghi ko. Utamonyo, di ampiang lubuak tompek mandi-mandi dek ughang kampuang. Taun potang keh, yo saghami nyeh umat po kiun. Poi balimau jo selpi-selpi bak nyi ughang kini eh. Bakodak baso Tan Tereang nyeh. Ado lo nan manggaleh, ado pulo poi bauru-uru se, ado pulo nan manenok-nenok daghi jauah. Bamocam.

Sabonanyeh, ndak banyak nan dikojoan deh. Paliang, manobeh atau maghambah saketek. Kok ba sawa atau maagiah aweh. Kok ado lantak nan patuk diagiah liah jam ghuntuah lamposiko. Maklum selah, ikan laghangan godang-godang. Kok di sudu nyeh eh. Walaupun kini agak kughang nampaknyeh ikan ko. Ntah ba dek bitu, ndak lo obeh dek Tan Tereang deh. Kok ado lo nan manyuluah malam-malam. Atau mungkin joloang paso ko, lah banyak lo ikan poi masuak suluk gak nyeh. Hehe

Namonyeh ghaso kebersamaan bak nyi ughang kini lai ghancak, mako katiko tibo aghi  nan ditakuak, ghamilah ughang kampuang nan poi. Kok dietoang, ado gak duo ghatuh ughang gak nyeh. Lobiah nan mudo-mudo. Dek tulang lai kuek, tanago sodang nomuah. Nan ughang tuo, lai juo ghami. Tukang bagi kojo, mancoliak an se, ntu maayoh an ntuak manambah samangek. Nan kenek-kenek ado lo ado juo. Walaupun poi bakayuaah-kayuah se nan banyak.

Kotu sodang lomak-lomak maghembeh, takojuk lah Tantereang. Ampiang jatuah liau ka lamposi lai. Bukan dek nampak ula aia atau ula moncik, indak pulo nampak lingkaghuang, apo lai lincoti. Liau manampak konco arek lawan kareh. Kawan sairiang sajalan. Sailia samudiak. Salapiak sakatiduran. Jang Kosiang, namo kanti nyeh. Jang Kosiang ko ughang nyo agak parlente. Gagah bontuak ughang India. Amita Bacan lah ghoman nyeh. Walaupun agak itam saketek, tapi lai itam manih juo. Kok obuak lai ndak bageluang atau kribo bona deh. Ikal nyi ughang kini. Jighembeh baiduk an lo.

Takojuk Tan Tereang ko bukan indak baalasan. Indak ado lo sejarahnyeh paja ko poi toroyoang deh. Kini tibo nyeh. “A lah nan ka tajadi ko aa” nyi Tan Tereang dalam ati.

Ughang ghami karojo. Babagai lah kojo nan dikakok. Ado nan mampelok-an jalan tughun ka lamposi, ado nan manobeh, ado lo nan maobuh aia se. Bamocamlah tiok ughang tu. Anak-anak lai pulo bakarojo a nan tolok dek inyo. Nan Jang Kosiang ko duduak di ghumah ikan.

Ba dek banaman ghumah ikan, ndak lo jaleh amek. Tapi, yo bontuak ghumah tembok. Permanen lo lai. Dibuek kalau ndak salah untuak supayo ikan nan ado di lamposi atau ikan laghangan ko dijago. Jan sampai ado maliang tau ughang maambiak-ambiak se. Gumah ikan ko bateras. Ado lo tompek duduak-duduak. Di situlah Jang Kosiang ko duduak sambia marokok-rokok. Yo bona liau kopuh-kopuh an asok nyeh.

Pukua sapuluah kughang sangenek, tibolah ughang maantaan paminun kawa. Lai banyak lo nan dibao dek induak-induak ko. Dilotak an lah di ghumah ikan ko. Sudah tu, baliak pulang baliak. Untuak luhua beko, ado lo nan lain nan maantan nasi.

Tan Tereang baghonti saghonyek dek ncoliaklah tibo nungkawa. Lah auh pulo liau dek kojo. Bakojalah aia putiah ka ghumah ikan ko. Liau imbau pulo kanti nan samo kojo.

“Lah rih lu wan eh, ten nungkawa lah tibo ah” nyi liau

“Yo, dulu lah.Tangguang sangenek ko ah. Di tukua juo tunggua ko stek ah liah disamek ko beko ah” nyi kanti sabolah sambia maayun an pagodoh ka aua ulu batang nan batambangan di topi lamposi.

Tan Tereang bajalan. Kotu tibo di ghumah ikan ko, batambah takojuk Tan Tereang dek kanti liau Jang Kosiang. Kok tangan, yo ndak baluluak deh. Baju ndak  lo kumuah. Baju barasiah, saghowa lepis licin juo boghu. Pakai lo sapatu lokak. Tupi bisbol balokek an pulo. Kacomato itam se nan ndak ado nyeh. Kok ado, yo bontuak binang pilem india bona.

“Lah lamo ang, Siang”

“Olah sonta”

“Buek lah kopi gai.Den olah lah mbuek ko ah” nyi Jang Kosiang sambia mancoliak an cangkia liau nan lah baisi. Liau iruk, ntu isok lo rokok. Yo nikmat bontuak nyeh iduk Jang Kosiang ko.

“Eh, iyo” nyi Tan Tereang sambia maambiak kopi jo gulo. Baambiak tromos, ntu babuek lah kopi santiang dek Tan Tereang. Aghi nan agak-agak lindok, ntu kojo di topi aia lo.Yo bona tibo ghaso kopi ko. Dek baun nyeh se, sabona santiang kopi Tan Tereang. Agak paik sangenek, tapi indak paik bona.Gulo jo kopi samo-samo taghaso. Yo bona nonik ghosonyeh.

Sabonta, lah tibo lo kanti-kanti di ghumah ikan. Lah bakumpua bacarito kinyak ken. Mulai daghi carito bla,sampai ka pilkada. Longkok ghonok. Tapi nan jaleh, tontu tontang iduk sabagai ughang tani.

“Ansua juo stek lai, Tan ah” nyi Jang Gogeh sambia togak.

“Beko sudah luhua, den ndak baliak keko lai gak nyeh. Ka maangkuk cighik kalawa nan di ngalau ten lo gak sasumpik untuak pupuak lado ah” sambuang Jang Gogeh

“Jadih” nyi Tan Tereang sambia baansua lo togak. Sogan.Wak lah lamo istrahat, ughang sabonta lah nak masuak lo liak. Katiko ka mulai kojo, tadonga lah sagho biah Tan Tereang.

“Dima lotak an nasi ko, da?” nyi Tek Ijuh. Ndak Mak Ijuh liau di imbau nyeh dek ughang lai. Sajak isu pejabat negara ko,lah bagonti se  namo. Hahaha.

“Eh, kinyak se lah bao ah” nyi Tan Tereang manjawek.

Kotu mancoliak, takojuk lo Tan Tereang. Indak dek si ocun liau ko deh, tapi dek paighiang di balakang nyeh. Gadih ghancak-ghancak se. Kalah lo anak gadi ben ben korea ten lai ah.

“Daghi ma lo lah dapek dek bini den gadih-gadih ghancak ko ko ah” nyi Tan Tereang dalam ati. “Ko lah ado kemajuan stek keh”nyi liau masih dalam ati.

“Yo bona santiang calon ibuk pejabat negara ko iah” nyi Jang Kosiang. “Lai mambao dayang-dayang di blakang . Ghancak-ghancak lo lai tih soman jo bintang pilem” sambuang Jang Kosiang ko.

“Ko yo samangek wak kojo nyeh keh” nyi kanti di balakang.

Dicoliak dek Tan Tereang, kain preman ko jinih juo ghu.

“Eh, anak-anak gadih sia lo nan kau bao ko Juh?” nyi Tan Tereang

“Apo mah, da.Cako kotu Ijuh jaln keko, basuo jo anak-anak ko. Keceknyo, nyo anak kuliah. Jadi keko untuak bakti masyarakat namonyeh.Tingga di siko sabulan”

“Eeeh. Anak Ka ka en mah iah” nyi Tan Tereang

“Iyo, pak” nyi gadih sabolah Tek Ijuh ko.

“Sia namo diak?” nyi Jang Kosiang manyolo

Dek ndonga itu, tobik muak Tan Tereang ka kanti ko mah

“Ang Siang eh. Kojo indak, sagalo indak. Kosannyeh iko nan ang koja keko iah. Patuk lah bakain ghancak jo sapatu lokak ang  keko. Kopi tandeh, rokok toroyoang abih lo. Karapai. Wak bakanti, mang. Tapi jan soman iko bona lai. Kok bakojo, yo kojo wak samo-samo. Jan tagak dek ado bungo ko. Kilen iyo, lo” nyi Tan Tereang ka preman di blakangnyeh.

“Jan sapambongih tih, da” nyi Tek Ijuh

“Usaho kan buliah, mang Tan” jawek Jang Kosiang

“Ba dek ka indak loh. Tapi jan banampak an bona. Kojo kakok juo. Soman se kotu kito badua masuak paso taun dulu di kelok mah. Ang ndak poi konsi, tapi tibo makan-makan dulu sakali. Kojo indak, ka lauak kancang. Jo kapalo-kapalo kambiang ang cucuk” nyi Tan Tereang sambia bajalan masuak lamposi.

 

Okto Muharman, budayawan yang tinggal di Batu Hampar, Limapuluh Kota.

Tinggalkan Balasan

Alamat email Anda tidak akan dipublikasikan. Ruas yang wajib ditandai *

This site uses Akismet to reduce spam. Learn how your comment data is processed.