MAIN PROYEK

No comment 28 views

MAIN PROYEKTRAVESIA.CO.ID – Proyek di kampuang Tan Tereang sodang banyak. Kalau ndak salah, duo puluah salapan lokasi. Dana nyeh ko, daghi Dana Desa jo nan lain. Walaupun desa tertinggal nyi ughang, dan dana desa saketek dapek, tapi jan salah salah, anggota dewan baghompek daghi kampuang Tan Tereang ko. Duo di Kabupaten, ciek di propinsi, ciek lo di pusat. Tentu banyak proyek nan bisa dilaluan dek dewan terhormat ko.

Bayangkan se lah, untuak tingkek Kabupaten se, soghang ughang apak apak dewan tu dapek piti aspirasi namonyeh duo miliar sataun. Olun nan di propinsi jo pusat lai tu ah. Ba ndak ka banyak proyek di kampuang Tan Tereang loh. Dana desa mang sangenek. Tapi, nan lain kan banyak. Walaupun tatingga saketek, tapi proyek baleak.

Proyek nan sabanyak itu, kok dietoang piti nyeh yo sabona ghami. Milyaran nilai nyeh. Bayangan se lah, bonda nan ado di kampuang Tan Tereang daghi ujuang ka ujuang batembok. Jalan nan ado di kampuang, bacor jo baaspal sadonyeh. Olun mbukak jalan baghu lai. Mbuek tompek wisata lo soman di tompek lain. Lamposi bajadian soman di Kapalo Bonda ten ah. Ba water bum, soman di Padang Panjang. Olun wisata ka poghak lai. Agro wisata nyi ughang kini. Lobiah ancak lo daghi Kik Tinggih ten ah. Ntu ado lo tobang layang soman pek Lawang. Bitu bona kampuang Tan Tereang kini. Jan dikecek an juo Desa Tertinggal dek ughang lai eh dek infrastruktur kurang. Kok daghi segi pendidikan, indak kalah daghi nan lain deh. Nan codiak banyak. Nan santiang baleak. Tu buktinyeh ah. Anggota dewan se ompek. Olun dietoang nan jadi guru jo dosen. Dotor jo propesor. Bahkan, indak bona tomat sakola lah, lah ado nan diangkek jadi Dotor jo Dosen. Bitu bona kampuang Tan Tereang ko. Hehe.

Baliak ka kaji proyek, nan Tan Tereang dek lai kenal jo anggota dewan nan di propinsi, liau lah nan jadi mondua di tigo proyek. Kebetulan, bakoghik koghik juo saketek. Amak Tan Tereang jo amak anggota dewan ko, samo amak amak. Nan ayam uwan tu jo ayam Tan Tereang , samo samo ayam daghi bangkok. Jadi bakoghik koghik juo lah. Walaupun beda andeh balain bapak.

Nan tigo proyek ko, mambukak jalan, maghancak an bonda sapanjang labuah nagoghi, ntu mambuek panampungan Aia, atau danau buatan. Cik Dam baso kanti Tan Tereang.

Nan namonyeh proyek, ntu ncaghi untuang. Bitu nyi Tan Tereang. Untuang dek awak dulu, boghu dek ughang. Proyek nan tigo ko kan batahap. Nan partamo dikakok kini, mbukak jalan. Dek Tan Tereang ntu dibaonyeh ka ampiang poghak nyeh. Yo, dek inyo nan manjuluak. Nan jaleh, awak mandapek, ughang indak kailangan, nan masyarakat tattoloing pulo. Jalan takojoan, ughang lain dapek lo makai, nan poghak tasilau juo. Walaupun poghak pisang, kok ndak tacoliak an, ntu ghimbo se nyeh. Kok di ampainyeh lo dek kogho eh. Atau kanti nan manyemba.
Saaghi sabolum slosai proyek ko, ado kusuk nyeh saketek. Walaupun sabonanyeh lah sapokan ko tadonga. Kusuk bulu ayam. Dek piti juo keh. Nyi kanti, sesuai kecek partamo, kok ado lobiah piti, bagi rato se lah piti lobiah upah tu. Nyi nan ado proyek, dek pengurus se. Buliah mamak nan ado proyek ko dapek lo. Tan Tereang kamaghi payah. Ditughuk an kanti nan kojo, kok ndak dapek lo proyek sudah ko. Kok indak ditughuk an, wak yo ibo. Akhia nyo, mangecek juo baliak ka tek ijuh.

“Jadi ma nan kaghancak manughuk kau, Juh ?”
Nan Tek Ijuh dek lah ponek ndonga keluhan ko tiok aghi, muak lo.

“Ma nan kaghanck dek uda selah eh. Lah poneklo Juh ncoliak uda nyeh. Sojak kojo di proyek ko ghaso lobiah lo uda daghi Pejabat Negara ten ah”

“Aaa ba dek bitu nyi kau eh. Cubo torang an ka den stek. Liah nak jaleh lo ah. Siang bak aghi toghang bak bulan”

“Yo. Kok pejabat negara, dek gajinyeh godang, tunjangan banyak, ndak ba bona nyeh pakai kameja de. Kok balokek an dasi jo jas, pantas juo. Sapatu lokak, bakilek, ntu pakai kapiah ciek. Patuk. Nyo bapiti. Ko uda boghu ado proyek ko gaya sajadinyeh. Tinggih lo ghuok pado boto. Kok sapatu lah bakilek lo. Ughang pakai bot, wak pakai spatu lokak. Ughang pakai tupi kojo,wakpakai moris. Ughang pakai dasi, a basalempang an pulo apuh tangan petak-petak tu liah nak soman koboi. Tapi lanjo Ijuh kughang daghi nan biaso. Piti skola anak ten lah talambek lo ah. Yo kagham Juh dek nyeh. Malu sabonanyeh bini uda nan kamek plus plus ko ha”

“Ondeh mandeh” Nyi Tan Tereang dalam ati. “Lah salah den batanyo”

“Uda….” nyi Ijuh mulai lombuk.”Buliah wak baproyek da. Tapi lughuh-lughuh. Jan sampai ughang maupek. Jan ndak sasuai jo pitunjuak nan lah ado. Kok konai uda beko, Ijuh juo nn ka merana nyeh da. Ontah kok ndak sayang uda jo Ijuh lai.

“Ondeh Juh… ba pulo indak ka sayang loh. Kok ndak sayang ka Ijuh, manomuah uda bantiang tulang, bantiang bosi bantiang stir bagai. Demi kau dan si buah hat itu Juh”

Okto Muharman, budayawan yang tinggal di Batu Hampar, Limapuluh Kota.

Leave a reply "MAIN PROYEK"